ភ្នំពេញ៖ គណបក្សប្រជាជនកម្ពុជា និងគណបក្សភ្លើងទៀន បានដាក់បេក្ខជនសម្រាប់ការប្រកួតប្រជែងការបោះឆ្នោតជ្រើសរើសក្រុមប្រឹក្សាឃុំ-សង្កាត់ច្រើនជាងគេបង្អស់ក្នុងចំណោមគណបក្សដែលចូលរួមប្រកួតប្រជែង។

យោងតាមលទ្ធផលបណ្ដោះអាសន្ននៃការចុះបញ្ជីបេក្ខជននៃគណបក្សនយោបាយឈរឈ្មោះបោះឆ្នោតសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ គណៈកម្មាធិការជាតិរៀបចំការបោះឆ្នោតឱ្យដឹងថារហូតមកដល់ថ្ងៃទី៨ ខែមីនា ឆ្នាំ២០២២ គណបក្សនយោបាយចំនួន១៧ បានដាក់ពាក្យសុំចុះឈ្មោះបញ្ជីបេក្ខជនសរុបចំនួន ៨៤ ២០៨ ក្នុងនោះស្ត្រីសរុបចំនួន ២៦ ៥៨៤នាក់។

បើតាមតារាងទិន្នន័យដែលផ្ដល់ដោយគ.ជ.ប គណបក្សប្រជាជនកម្ពុជាបានដាក់បេក្ខជនច្រើនជាងគេដែលមាន ២៨ ០០៨នាក់ ក្នុងនោះស្រី ៧ ២៦២នាក់ ខណៈគណបក្សភ្លើងទៀនដាក់បេក្ខជន ២៣ ៦៧៩នាក់ ក្នុងនោះស្រី ៥ ៣៧២នាក់។

ការចុះបញ្ជីបេក្ខជននៃគណបក្សនយោបាយឈរឈ្មោះបោះឆ្នោត សម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ បានបញ្ចប់ក្នុងរយៈពេល៣ថ្ងៃ គឺចាប់ពីថ្ងៃទី៤ ដល់ថ្ងៃទី៦ ខែមីនា ឆ្នាំ២០២២។

ការបោះឆ្នោតក្រុមប្រឹក្សាឃុំសង្កាត់អាណត្តិទី៥ ឆ្នាំ២០២២ នឹងចាប់ផ្ដើមនៅថ្ងៃទី៥ ខែមិថុនា ឆ្នាំ២០២២ ដើម្បីជ្រើសរើសសមាជិកក្រុមប្រឹក្សាថ្មីជំនួសក្រុមប្រឹក្សាឃុំសង្កាត់ចាស់ដែលផុតអាណត្តិ។

ក្នុងការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្កិទី៤ ឆ្នាំ២០១៧ គណបក្សប្រជាជនកម្ពុជាយកបាន ១ ១៥៦ឃុំ-សង្កាត់ គណបក្សសង្គ្រោះជាតិយកបាន ៤៨៩ឃុំ-សង្កាត់ និង១ឃុំបានទៅលើគណបក្សខ្មែររួបមជាតិរបស់លោក ញឹក ប៊ុនឆៃ៕